Абу-Дабидің Мәдениет және туризм департаменті Гуггенхайм Абу-Дабидің ресми ашылу күнін жариялады. Заманауи және қазіргі өнерге арналған музей 2026 жылғы 11 желтоқсанда ашылады.
30 галерея және он алып конус
Прицкер сыйлығының лауреаты Фрэнк Гери жобалаған ғимарат Саадият аралында, құрлық пен теңіз түйіскен жерде орналасқан. Музейдің жалпы салынған аумағы 80 мың шаршы метрді құрайды: ішкі галереяларға 11 600 шаршы метр, ал сыртқы көрме алаңдарына 23 мың шаршы метр бөлінген.
Ғимаратта орталық атриуммен байланысқан 30 галерея бар. Биіктігі 88 метрге дейін жететін он мүсіндік конус көлеңке мен табиғи желдетуді қамтамасыз етеді.
1960 жылдан бергі өнер
Музей кескіндеме, мүсін, инсталляция, фотография, қозғалмалы бейне және жаңа медианы қамтитын туындыларды көрсетеді. Коллекция 2009 жылдан бері жиналып келеді және 1960 жылдан бүгінге дейінгі өнерді абстракция, бұқаралық мәдениет, жер, тіл және әңгімелеу сияқты тақырыптар арқылы ұсынады.
Гуггенхайм Абу-Даби Саадият мәдени ауданындағы Louvre Abu Dhabi, Zayed National Museum, Natural History Museum Abu Dhabi және teamLab Phenomena Abu Dhabi қатарына қосылады.
